U NGA RILI! (Xitsonga)

U nga rili!

Mpama wa Afrika;
Xihuhuri xa le dzongeni;
Xilombe xa le n’wa lungwini;
U tove hi yini

U ngo rila unga biwangi;
U vone yini?
U ngo bokomula unga tlhaviwangi hi muntwa;
Va lo ku orhelisa yini?

Ina, Va Ntswari-wa-handle va ta ku hembela;
Va ku yenga hi rifuwo na ntivo;
va ku onga hi swiyovi-yovi na le swo tsokombela;
Ivi va dhavula mbilu ya wena hi le xikarhi;
Kambe, u nga rili!

Va sungule va Van Ribiek;
Va ku tekela misava hi xivoni;
Va vuya va ku tekela ndhavuko, va ku chela vulolo;
Va ku tshimbitela hi tindlela ta wena ta vurimi;
Va ku va swi kota ku antswa;
Kasi hi loko machukela ni ti ‘high blood’ ti sungurile;
Misava yi karhala ku phamela swibyariwa.

Loko u ku wa ha wisininyana;
Va ku teka u famba na misava;
Va ku endla bhayisikopo hikwalaho ka nyiko ya switshamo, Yehova anga ku nyika yona;
Va ku una vuharhi loko u lwa swiqivi;
Kambe va ku tisela swibalesa leswaku u ta dlaya vamakwenu hi ntalo, hi ku hatlisa.

Kambe unga rili Tshembye ra Afrika;
A wu tiendlanga;
U dlayisa hi malwandla;
U dlayisa hi ku tshemba ngopfu vanu vanwani;
Ku pfumela ka wena leswaku ku hava muhlampfa, ku hava nkala-nwini;
Hinkwenu hi vahundzi-va-ndlela;
Va tsendzeleki lava lavaku madyelo yo antswa;
La tshembelaku ku ndlela ho fambisana.

Va kumile u huha hi nsuku;
U khavisa muti wa wena hi tidhayimani;
u xixima misava mana wa wena,
Uku wundla, xi taku wundlawu;
Hi makolo va swi herisa;
Va ku hundzula nala wa vumunhu bya wena;
A swi hlamarisi ku vona leswi humelelaka namuntlha.

Kambe unga rili!
swi ta tshamiseka;
Va ri swilo hinkwaswo swi tirhela ku lulami;
Mpama wa Afrika,
Loko ndzi ehleketa maxangu ya wena;
Ndza tsandzeka kutihoma;
Kamber unga rili!
Vanhu hinkwavo va fanela ku rila,
Kambe ku nga ri wena!

Loko u boxeka, Ndzi ta tiyisa hi mani;
Loko swi tsandza wena, Hi ta tiyela eka mani;
Nyeleti ya dzonga, u nga rili, swi ta hundza;
U ta kuma vutinyungubyisi bya wena futhi;
Vumunhu bya wena uta byi dyondza futhi

U ta ri kuma rifuwo ra wena futhi;
U ta vangama, tintsumi ta tilo ti ka ti ku navela;
U ta thela u haha futhi;
Ntswamba wu ta khuluka emarhumbyini ya wena nakambe;
Misava yi ta ku nhlatela nsuku wa yona lowo tenga;
Unga rili, Swi ta lulama

Advertisements
Comments
One Response to “U NGA RILI! (Xitsonga)”
  1. onasiss gwambe says:

    I xitlhokovetselo xo fuwa no hlohletela. Kunene Afrika u dlawela mafundza no andlalela rimenyo sangu. Muhlwa wu muhlile Afrika wa tolo. Hi lo sala na Afrika wa sirha.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: